ഒരു സ്വാർത്ഥ ചിന്ത

           

തെറ്റുചെയ്യുന്നതു രണ്ടാളുമെങ്കിലും
ശിക്ഷയേൽക്കുന്നതു സ്ത്രീമാത്രമാണെന്നും
ആൺകോയ്മ താണ്ഡവമാടുന്ന ഭൂമിയിൽ
ഈക്കാട്ടുനിതിയോ കൊഞ്ഞനം കുത്തുന്നു.

അച്ചനില്ലാതെ കുരുക്കില്ലൊരുണ്ണിയും
അച്ഛനില്ലാത്തവനായെന്നുദരത്തിൽ
അറിയുന്നു നിൻ ചലനമതൊരനുഭൂതിയായ്,
ഉപേക്ഷികില്ലുണ്ണീ നിന്നച്ഛനെപ്പോലവേ.

വയറൊളിക്കാനാകില്ലെനിക്കിനി
നാടറിയും മാസങ്ങൾ കഴിയവേ പിന്നെ
അപമാനാഗ്നിയിൽ വെന്തുരുകും
പിഴച്ചവളെന്നവരട്ടഹസിച്ചീടും

അച്ഛനില്ലാത്തോനെന്ന പേരെടുത്തീടുവാൻ
കാരണമാക്കിയതമ്മതൻ ദോഷമെങ്കിലും
കാണേണം നിന്നുടെയാ പൊൻമുഖം
മതൊരമ്മതൻ ചാരിതാർതഥ്യമോടവേ.

കലികാലക്കോമരംകലിതുളളിയാടുന്ന
ഭൂമിയിലേക്കു ഞാൻ നിന്നേ ക്ഷണിക്കുന്നു
പോകേണ്ടതുണ്ടു നമുക്കൊരുപാടു ദൂര
മതുതാങ്ങുവാനിളംമനസ് സജ്ജമായീടണം

സ്വാർത്ഥമാണുണ്ണീയിതമ്മയുടേയെങ്കിലും
പൊറുക്കേണമെന്നേശപിക്കാതെയൊരുനാളും.
സ്വാർത്ഥത വാണീടും ഭൂമിയിലെനിക്കിനി
നീയേയുളളൂവെന്നറിഞ്ഞീടുകോമലേ

                                        റോസ്